Victoria tanto na Junior como na Clio Cup e unha moi meritoria oitava posición scratch é o magnífico balance de Fran Cima e o seu copiloto Pablo González no rallye Shalymar, última proba do Campionato de España de Rallyes de Asfalto 2008.

O novo piloto asturiano realizou un excelente rallye ao volante do seu Clio R3, co que non tivo o menor problema para impoñerse na clasificación do monomarca de Renault, do que remata o ano como subcampión. Fran sumou ademais un novo e claro triunfo no apartado reservado aos pilotos menores de 23 anos, o Trofeo Junior de España, do que xa chegaba a Madrid como campión.

Pero realmente o que máis satisfacción daba a Cima e o seu equipo era o rendemento de todo o conxunto ao longo deste Shalymar 2008, con cronos sempre entre os dez mellores da xeral e saíndo ademais gañador no último tramo dunha pechada e bonita pugna mantida practicamente ao longo de toda a xornada co Nissan 350 Z do campión madrileño de rallyes Rubén Gracia.

Malia a maior potencia do GT xaponés e ao lóxico superior coñecemento do terreo do seu piloto, Cima estivo sempre nos cronos do seu rival, para acabar arrebatándolle a oitava posición absoluta da clasificación xeral na pasada final polo circuíto do Jarama. Fran facía bo uso da súa experiencia de piloto de motos en circuíto e atopábase especialmente a gusto no clásico trazado madrileño, o que lle permitía compensar a moi superior cabalaría do Nissan a base de excelentes trazadas apoiadas no magnífico comportamento dinámico do Clio R3, que rendía de modo fantástico ao longo de todo o rallye e mostrábase especialmente eficaz en mans de Fran nas curvas do circuíto.

Con este bo resultado no Shalymar, Cima pecha a súa tempada no Campionato de España de Rallyes 2008, no que a súa progresión ao volante do R3 foi constante, o que lle permitiu facerse co seu segundo título nacional junior e co subcampionato na primeira edición da Clio Cup destinada ao novo modelo de Renault nos rallyes.