Última cita en asfalto do trofeo Produción Rallye Racing e do Campionato de España da especialidade
Álvaro Muñiz, piloto coruñés que este ano competiu no Nacional de Rallyes a bordo dun Mitsubishi Lancer, dentro do trofeo Produción Rallye Racing, competirá a próxima fin de semana no madrileño Rallye Shalymar, última cita do Campionato de España de Rallyes de asfalto.

Muñiz, que se proclamou este ano Campión de España da categoría "Produción" en rallyes de terra, non puido facer o propio en asfalto, onde o asturiano Carlos Márquez saíu como Campión do pasado Rallye Costa Brava. Queda tan só pendente de dirimirse o campionato absoluto (contando as probas disputadas en asfalto e terra), onde aínda que Álvaro aínda ten opcións matemáticas, en principio o que o ten máis doado é o catalán Jordi Martí.

 

Non obstante, o coruñés sairá ao rallye madrileño coa vitoria como único obxectivo, disposto a facer un bo papel nunha das citas que promete ter maior repercusión do ano, tanto por disputarse na capital con interesantes novidades, caso dun tramo en pleno circuíto do Jarama, coma por ser o escenario onde Enrique García Ojeda (Peugeot) e Sergio Vallejo (Porsche) se disputarán o título absoluto do Nacional de asfalto.

Unha vez disputada esta proba, a seguinte cita do trofeo Produción Rallye Racing será a última, e terá lugar sobre tramos de terra en Tárrega (Lleida), o 6 de decembro.


Así vai o Campionato: